MONÓLOGO DUNHA MULLER MALTRATADA
Ola. Eu... é que... non
sei como dicilo... Vale, como queira. Estiven a buscar e este foi o único
número de teléfono que atopei. Non sei se vostede me pode axudar. É que non sei
que facer. (Pausa) Ameazoume.
Se cadra non é aí onde teño que chamar.
(Silencio) Si. Vale. (Pausa) É que, perdoe, (pausa) non tiña que atreverme a chamar,
supoño. (Pausa) Non sei que
facer. (Pausa.) Oia, pero isto é anónimo, non? (Pausa) Seguro? (Levantando a
voz) Está vostede segura? (Pausa) Mire, el vaise enfadar aínda máis e agora
ameazoume.(Berrando) Estou encerrada na miña casa porque el me ameazou.
Enténdeo? (Silencio) Sinto terlle
berrado. Síntoo moito. (Silencio) (Anda dun lado a outro, sen cesar) Non. Non
llo contei a ninguén. Non pensaba que fose a chegar a... onde chegou. Que fago?
Eu teño unha carreira, cría que a min non me podería pasar. Sempre lle acontece
a outras... que estou a dicir? (Pausa) Asegúrolle que antes... (Pausa) Hai tres ou catro meses todo era distinto.
Ata nos fomos unha semana, ao apartamento dos seus pais. (Pausa) Como ía pensar
eu que este fillo de...! Grazas por escoitarme. (Respira profundamente). Empezamos a saír moi rápido. Coñecémonos nun
chat. Xa coñecera outros homes así. (Pausa) . Non moi
alto, delgado, así, fibroso pero con algo de tripiña.
Está moi coitado co da súa altura. (Pausa) Na súa aldea puxen tacóns porque fomos ás festas e cabreouse
moito. (POUCO A POUCO SOLTA O TELÉFONO
NO CHAN E SEGUE FALANDO) Díxome que o fixera a propósito para deixalo en ridículo,
que o único que quería era resaltar que el era máis baixo, que se esa era forma
de querer un noivo. Eu díxenlle “non o fixen por iso. Prométocho. Só quería
estar máis guapa. Non o entendes? (Pausa longa) Medimos o mesmo. Non es máis baixo. A min gústasme
así. Non te anoxes. “ (Silencio) Non me deixa falar por teléfono cos meus amigos. Borroume
os números de teléfono. "Eses non son amigos, só queren volver divertirse
contigo”. (Pausa) "Os corenta ladróns". Así os chama para
"non" me faltar "ao respecto". Nunca me sentín tan
humillada. Trátame como se fose unha lurpia : “Quen te chamou? " " De
quen é esa mensaxe? " " Que casualidade que recibas as mensaxes cando
eu non estou!"… Todos os días, todos... Esta é a cuarta vez que o deixo.
Vai ser a última, xa non me dá pena. (Pausa) Agora algo
cambiou. Antes contestáballe e iso, pero agora, agora,… antonte cando lle dixen
que o deixaba fumaba compulsivamente, non deixaba de mirarme e agarrar o meu
can. (Pausa) Íame
pegar. Nunca me pegara . Pero íame pegar, seino. Non berrou. Acariciába o can e
mirábame. O meu pobre canciño. (Silencio)Tiña os seus ollos cravados nos meus.
"Ninguén te vai querer como te quero eu". De súpeto, cambiou. Soltou
bruscamente o can e eu collino no meu colo. Ergueuse. Acendeu un cigarro e
dixo: " Quen vai aguantar unha gorda enferma? Ninguén vai te querer. Non
sabes canto te equivocas ao deixarme “
Teño a súa mirada
incrustada na miña mente. (Berrando e chorando) Que non me volva suxeitar máis!
Que non se achegue a min! (Pausa) Levo dous
días sen saír de casa, o meu can mexa e caga
aquí, dáme igual, limpo con lixivia. Eu
non vou saír de casa. Sabe onde vivo. Non podo encontralo na rúa. Aquí teño as
miñas cousas e comida. E cando quede sen comida? Que podo facer? (Longo
silencio) O día que quedamos por primeira vez, baixou
do autobús na Coruña. Axiña nos recoñecemos. Achegámonos e deume un bico.
Colleume da man e díxome "nena, ti e eu imos estar xuntos toda a vida.
Presíntoo".
Belén vou facer esta obra para o da proba oral !
ResponderEliminar